السبت، 23 أكتوبر 2010

مصر حلوة اوى :)) - الجزء الاول -

كذا حد قاللى انت قاعد بتكتب عن الحاجات السيئة اللى فى البلد و مش بتكتب عن الايجابيات ... فقررت اننى اكتب دلوقتى عن الحاجات الجميلة الحلوة :))

صحيت انهاردة لقيت الجو جميل ... اخيرا نقدر نقول " الدنيا ربيع و الجو بديع " .. - مع اننا فى الشتاء المفروض - .. المهم .. جو جميل و شمس لطيفة مش من النوع اللى يخليك قرفان من الدنيا ...

نزلت ركبت العربية و بدأت أتحرك ... ربنا الحمد لله رزقنا اننا اتولدنا فى بلد فيها شوارع ... يااااه ... حاجة جميلة .. مش كل الدول وصلت لمرحلة التقدم انها يبقى عندها شوارع زينا ... صحيح الشوارع مكسرة شوية و فيها بلاعات ... بس شىء جميل انك تقدر تتحرك من مكان لمكان باستخدام الشوارع دى ...

و فجأة .. وصلت لانجاز رهيب فى بلدنا ... شىء لازم نفتخر بيه ... و اى حد يقولنا انتوا بلد متخلفة ... نقولوا اوعى تقول كدا .. احنا عندنا انجاز فظيع ... " الطريق الدائرى " ... ياااه على الطريق الدائرى و حلاوته ... طريق بيوصلك لاى حتة فى نص ساعة بالكتير - بس الكلام دا على الساعة ٢ بليل و الدنيا فاضية - .. انما وقت الزحمة نستحمل شوية يا جماعة نقف ساعة على الدائرى العظيم مفيش مشكلة ... على الاقل ممكن و احنا واقفين فى الزحمة نتأمل عظمة الطريق الدائرى ... الله عليكى يا مصر ... هو صحيح فى سوء تخطيط عشان عملنا الدائرى و قعدنا نبنى نوادى و عمارات و مساكن جمبه لحد ما بقى زحمة .. بس برضه دا انجاز جميل ...

خلصت الدائرى و كنت رايح وسط البلد فا مشيت على الكورنيش شوية ... ياااه على جمال النيل و حلاوته فى القاهرة ... لونه اخضر جميل يفتح النفس ... ايه يعنى شوية قاذورات و زبالة مرمية فى النيل ... مش مشكلة ... احنا اللى رمينها ... شعب جميل بس بينسى موضوع انه ما يرميش زبالة فى النيل ...

وصلت وسط البلد لقيت شىء رائع دول قليلة جدا فى العالم عملوه ... الاشارة اللى بكاميرا ... ياااااه على جمال التكنواوجيا و حلاوتها ... صحيح الدنيا زحمة جدااااااا ... و فوضى رهيييييبة ... و الناس الواصلين اللى معاهم وسايط بيكسروا الاشارة عادى و يكسر على بقيت الناس ... و المشاة بيعدوا فى اى وقت فى كل حتة ... انما شىء جميل يكون عندنا اشارة بكاميرا ... عمار يا مصر ...

قولت اركن العربية ... و انزل آخد المترو ... انجاز عظيم المترو دا ... هو صحيح ساعات بيعطل ... او ييجى متأخر ... دا غير ان عربيات المترو سيئة التهوية و ممكن يجيلك جميع الامراض من قلة الاكسجين ... بس انجاز جميل برضه ...

طبعا اجمل حاجة فى مصر شعبها الطيب الجميل ... الناش ماشيين مبسوطين و بيضحكوا ... مفيش خناقات و مفيش حد بيرخم على حد ... البنات ماشيين براحتهم محدش بيعاكسهم ولا بيضايضقهم ... الاهالى نازلين للحدائق و كل عائلة بتخلص اكل و يشيلوا زبالتهم معاهم .. مش بيسيبوها فى الحديقة خالص ... و تخش المحلات تلاقى الناس بتبعلك السلعة بتمنها الحقيقى ... مش بينصب عليك .. و مش حتضطر انك تفاصل عشان الاسعار منطقية ...

الله عليكى يا مصر ... مصر حلوة ...
على العموم الشىء الاكيد .. ان مصر ممكن تبقى حلوة ، و فيها حاجات حلوة فعلا ، بس احنا اللى وِحشِين ... احنا اللى مش عارفين نتقدم ... و احنا اللى بنشوه اى انجاز ممكن يكون اتعمل ... و طول ما احنا كدة ، حتفضل مصر وحشة ... لحد ما احنا نرجعها حلوة تانى ... بس بما ان مصر عايزة ١٠٠ سنة عشان ترجع حلوة بعد اللى حصل فيها ... ف انا بدعو الاجيال القادمة انهم هم يرجعوا مصر .. و الاجيال الحالية انهم يتقبلوا نقدى للاوضاع :)) ...

كتب هذا المقال كريم حلمى بعد ان ألح عليه اصدقائه انه يكتب عن الحاجات الحلوة فى البلد ...


هناك 3 تعليقات:

  1. walahy el 3azeem no.1 fan enta hayel ya karim wana bgd mesh hahda isa el lama ashofak 3ala awel taree2 el lama3an wel shohraa 3shan bgd bgd enta hayel w bgd talented masha2allah w t2olyy ana shayef en lesa lesa meen ya abo lesa da howa wa2to bss ba2olak aih 2w3a ya karim lama teshteher kda isa lama agy 2a2olohom ana 3rfaah tetbara meny wala 7aga ;) lool laa entaa aslyy walahyy w lool 7asa 2ny 2t2asart awii bss dah walahy ta2seer el blog beta3ak w kalamakel fazee3 bi 7alawa lool 2olt 2a7aded fazee3 men anhy noo3 w 3omooman lool knt hakteblak meen an fel 2a7'er w b3dain 2olt 2l3ab ma3ak hide and seek lool fa 7awel te7azar fazar ana meen w wenaby 2b2a kalemna 3n mawdu3 fazar aih fazar diiih aih 3elaketaa bel " GUESSING " ana mesh adra afham lool 3ala el 3omoom ana hamshy abl ma el blog yekarar yenhar fi weshy w y2olyy ya mama daa esmo comment box mesh makala wala paragraph  katab haza el maghool el howa ana b3d kera2et el blog beta3 karim helmy w ana la astame3 ay 7aga

    ردحذف
  2. أزال المؤلف هذا التعليق.

    ردحذف
  3. kimmmiii a7'eeran aret ur blog :D:D hehehe ho3d assa7'sa7' shwaya abl manam :D guten nacht

    ردحذف