مصر حلوة اوى :)) - الجزء الاول -

كذا حد قاللى انت قاعد بتكتب عن الحاجات السيئة اللى فى البلد و مش بتكتب عن الايجابيات ... فقررت اننى اكتب دلوقتى عن الحاجات الجميلة الحلوة :))

صحيت انهاردة لقيت الجو جميل ... اخيرا نقدر نقول " الدنيا ربيع و الجو بديع " .. - مع اننا فى الشتاء المفروض - .. المهم .. جو جميل و شمس لطيفة مش من النوع اللى يخليك قرفان من الدنيا ...

نزلت ركبت العربية و بدأت أتحرك ... ربنا الحمد لله رزقنا اننا اتولدنا فى بلد فيها شوارع ... يااااه ... حاجة جميلة .. مش كل الدول وصلت لمرحلة التقدم انها يبقى عندها شوارع زينا ... صحيح الشوارع مكسرة شوية و فيها بلاعات ... بس شىء جميل انك تقدر تتحرك من مكان لمكان باستخدام الشوارع دى ...

و فجأة .. وصلت لانجاز رهيب فى بلدنا ... شىء لازم نفتخر بيه ... و اى حد يقولنا انتوا بلد متخلفة ... نقولوا اوعى تقول كدا .. احنا عندنا انجاز فظيع ... " الطريق الدائرى " ... ياااه على الطريق الدائرى و حلاوته ... طريق بيوصلك لاى حتة فى نص ساعة بالكتير - بس الكلام دا على الساعة ٢ بليل و الدنيا فاضية - .. انما وقت الزحمة نستحمل شوية يا جماعة نقف ساعة على الدائرى العظيم مفيش مشكلة ... على الاقل ممكن و احنا واقفين فى الزحمة نتأمل عظمة الطريق الدائرى ... الله عليكى يا مصر ... هو صحيح فى سوء تخطيط عشان عملنا الدائرى و قعدنا نبنى نوادى و عمارات و مساكن جمبه لحد ما بقى زحمة .. بس برضه دا انجاز جميل ...

خلصت الدائرى و كنت رايح وسط البلد فا مشيت على الكورنيش شوية ... ياااه على جمال النيل و حلاوته فى القاهرة ... لونه اخضر جميل يفتح النفس ... ايه يعنى شوية قاذورات و زبالة مرمية فى النيل ... مش مشكلة ... احنا اللى رمينها ... شعب جميل بس بينسى موضوع انه ما يرميش زبالة فى النيل ...

وصلت وسط البلد لقيت شىء رائع دول قليلة جدا فى العالم عملوه ... الاشارة اللى بكاميرا ... ياااااه على جمال التكنواوجيا و حلاوتها ... صحيح الدنيا زحمة جدااااااا ... و فوضى رهيييييبة ... و الناس الواصلين اللى معاهم وسايط بيكسروا الاشارة عادى و يكسر على بقيت الناس ... و المشاة بيعدوا فى اى وقت فى كل حتة ... انما شىء جميل يكون عندنا اشارة بكاميرا ... عمار يا مصر ...

قولت اركن العربية ... و انزل آخد المترو ... انجاز عظيم المترو دا ... هو صحيح ساعات بيعطل ... او ييجى متأخر ... دا غير ان عربيات المترو سيئة التهوية و ممكن يجيلك جميع الامراض من قلة الاكسجين ... بس انجاز جميل برضه ...

طبعا اجمل حاجة فى مصر شعبها الطيب الجميل ... الناش ماشيين مبسوطين و بيضحكوا ... مفيش خناقات و مفيش حد بيرخم على حد ... البنات ماشيين براحتهم محدش بيعاكسهم ولا بيضايضقهم ... الاهالى نازلين للحدائق و كل عائلة بتخلص اكل و يشيلوا زبالتهم معاهم .. مش بيسيبوها فى الحديقة خالص ... و تخش المحلات تلاقى الناس بتبعلك السلعة بتمنها الحقيقى ... مش بينصب عليك .. و مش حتضطر انك تفاصل عشان الاسعار منطقية ...

الله عليكى يا مصر ... مصر حلوة ...

على العموم الشىء الاكيد .. ان مصر ممكن تبقى حلوة ، و فيها حاجات حلوة فعلا ، بس احنا اللى وِحشِين ... احنا اللى مش عارفين نتقدم ... و احنا اللى بنشوه اى انجاز ممكن يكون اتعمل ... و طول ما احنا كدة ، حتفضل مصر وحشة ... لحد ما احنا نرجعها حلوة تانى ... بس بما ان مصر عايزة ١٠٠ سنة عشان ترجع حلوة بعد اللى حصل فيها ... ف انا بدعو الاجيال القادمة انهم هم يرجعوا مصر .. و الاجيال الحالية انهم يتقبلوا نقدى للاوضاع :)) ...

كتب هذا المقال كريم حلمى بعد ان ألح عليه اصدقائه انه يكتب عن الحاجات الحلوة فى البلد ...

ارحمنا يا رب - الجزء الرابع -

ايه السخافة و الفراغ و التفاهة اللى احنا وصلنالها دى !!

قالك لو انت مبسوط اكتب ١٢ سم ... لو انت بتحب اكتب ١٧ سم ... !!!

يعنى هو للدرجة دى في دماغ فاضية من جوه !! ..

اللى مش فاهم ايه اللى انا بقوله يركز معايا هنا ... اللى حصل انه من يومين ظهرت على ال facebook تقليعة جديدة من النوع الاهبل جدا ...

البنات بيبعتوا لبعض رسايل بتقول انهم عايزين يكتبوا status الولاد ما يفهموش دا بيعبر عن ايه ! ...-- " على اساس ان الشعب كله اهبل و حوقف حياتى و يومى و حفضل قاعد فى البيت عشان افهم ام ال status بتاعك بيقول ايه " -- المهم .. اتفقوا على codes كدة ... يعنى ١٢ يبقى مبسوطة ... ١٤ بِتحِب ... الخ الخ ...

ايه بقى !! ؟؟

عايزه ايه انت لما عملتى كده ؟؟!

المشكلة كمان انه مش مجرد بيحطوا ال status .. دا الموضوع اخد اكبر من حجمه ... و بقى فيه عنصر ال suspence ... و عنصر المغامرة !!! يعنى تلاقى ال comments واحدة بتسأل هو ايه دا ... ف التانية تقولها حبعتلك على ال inbox افهمك ... او هكَلِمِك ... عشان طبعا سرية الموضوع الرهيب ... و بعدين بقى البنت اللى فهمت دى تتحمس و ِتِحس انها خبيسة بقى و تقوم كاتبة status هى كمان !!! ... و فى فرحة و سعادة بالموضوع !! و تِحِس ان اليوم كله مفيش حاجة فى الدماغ غير الهبل دا !!

الجديد بقى ... انه عنصر السفالة هيبدأ يدخل فى الموضوع ... البنات بيبعتوا لبعض دلوقتى مجموعة جديدة من ال codes ... فيها حروف و ارقام ... الحروف و الارقام دى بتعبر عن مقاس حاجات هم بيلبسوها " لا مؤاخذة يعنى انا آسف " ... طب ايه !! اقول ايه انا مش عارف !! .. و بعدين لما واحد يفهم الموضوع و يِقِل أدبُه على البنت دى و لا يقولها تعليق مش كويس ... والله يبقى معاه حق !! ما هى اللى جابته لنفسها !!

دا طبعا غير انه كان فى حاجة زى دى قبل كدة كانوا بيكتبوا لون اللى هم لابسينوا دلوقتى !!! و طبعا انتوا فاهمين لون انهى قطعة بالظبط من اللى لابسينه !!

طب حد يقولى استفدنا ايه !! ؟؟

دا غير ان الارقام دى اصلا ساعات ما بتبقاش بتعبر انها مبسوطة و زعلانة و كدة ... ساعات بيبقوا متفقين على جمل فى منتهى السفالة و الوقاحة و قلة الحياء ...

طب نبعد عن قلة الادب و نِرجع للفراغ و الهبل تانى ... امبارع اتبعت لواحد صاحبى على ال BBM ... انه يكتب

لو مبسوط -- GUCCI

لو متضايق -- GUESS ..

الخ الخ ...

ارجوكم يا جماعة ... كفاية سخافة و تقل دم و تفاهة ...

لو عندكوا وقت فاضى اعملوا اى حاجة غير ان يكون دمكوا تقيل..

انا مش عامل فيها الواعظ .. و مش هقولوكوا اقعدوا اقرأوا كتب و مجلات و جرايد ،،، بلاش ، اعملوا اى حاجة لطيفة .. اسمعوا اغانى ... موسيقى ... اي حاجة ... و لو عايزين اوى يعنى تكتبوا حاجة على ال status ... اكتبوا نكتة .. على الاقل يمكن تطلع حلوة ...

مفيش مشكلة نعمل حاجات عبيطة ... بس يكون دمها خفيف .. مش سفالة و تقل دم !!

هنا القاهرة .... ارحمناااااااااا يا رب !!

كتب هذا الحوار كريم حلمى بعد ان ذهل من كم الفراغ و التفاهة اللى و صلناله ... و بعد ما اتعصب من تقل دم التفاهة دى ...

ارحمنا يا رب - الجزء الثالث -

عزيى القارىء ... ما سوف تشاهده فى ال video الموجود بالاسفل قد يتعبك نفسيا ... فهو بمثابة الصدمة ... بل أكثر من ذلك ... انها الكارثة .... بل اكثر من ذلك ... انها الطامة الكبرى ....

اتفرجوا و تعالوا تانى نِعَيَط و نتعصب مع بعض ! بس لو سمحتو كملوا ال video للآخر ..

http://www.youtube.com/watch?v=_99BobHjHpA

ايه دا بقى !!

دا نقول عليه ايه ؟؟؟

السؤال هل دا راجل ؟؟ الاجابة لا طبعا

السؤال الثانى ، هل دى بنت او سيدة ؟؟ الاجابة لا برده ...

دا كائن حى لا يصل الى مرحلة الانسان لأنه ببساطة لا يمتلك ما يُمَيِز الانسان اللى هو المخ ...

واضح ان الكائن دا مش بيفكر ...

واضح انه لا يستطيع ان يفهم يعنى ايه مراية ... ما هو لو كان بص فيها ما كنش عمل كدة ...

واضح انه لا يستطيع التمييز بين اللى الناس ممكن تتفرج عليه و تسمعه ... و بين اللى الناس حيخبطه كف على كف و هم بيشوفوه ...

واضح كمان ان تكوينه الجسمانى بعيد شوية عن تكوين الانسان ... رغم ان عنده عدد ٢ رجل و ٢ ايد ... الا ان حركتهم مع حركة الوِسط بعيدة تماما عن حركة الانسان الذكر ... كما انها تتعدى حركة الانسان الانثى !!

الصوت كمان بيوضح انه مش انسان ... هذا الكائن بيصدر اصوات و نغمات لا يقدر الانسان الطبيعى ان يفهمها بسهولة ... بل فى بعض الاحيان تحتاج الى جهاز كمبيوتر لفهم هذه الاصوات ...

حاجة تانية بتوضح ان الشىء دا مش انسان ... الكلام اللى هو بيقوله ما لوش معنى عند البنى آدم الطبيعى ... يعنى الانسان الطبيعى مش هيفهم الشىء دا بيقول ايه ... انما ممكن يكون الكلام دا مفهوم عند نوع من الحيوانات او حاجة ! ..

تعالو نشوف مع بعض بيقول ايه " لا لا لا الا الحب ... لا لا لا اوعى تطب ... لا لا لا لا يا غرام ... انا متهنى براحة القلب ... قاله عليه اه حكايات ... قالوا حاجات و حاجات و حاجات " يعنى ايه مش فاهم ... عايز ايه انت يعنى ؟! .. طب نكمل يمكن نفهم ...

" خايف على قلبى يدوب ... و يضيع و انا اضيع وياه ... و مليش فى الحب مكان ... و بخاف من قولة آه " !!! يا اخى ما تضيع و لا تروح فى داهية ...

فى النهاية احب اقول ان الشركة المنتجة اسمها " عالم الأصالة " ... لا واضح انها شركة أصيلة فعلا !!!

ارحمنا يا رب !!

هنا القاهرة ...

كتب هذا المقال كريم حلمى و هو يضحك احيانا و يتعصب احيانا من الصدمة اللى شافها فى ال video ...

حوار مع Sequoia

ازيك يا Sequoia

عامل ايه ياخويا

على فكرة انا بستتقِل دَمك

و بقيت مش فاهمك

قاعد تِغَلِى فى اسعارَك

و مش فى بالك

والناس بَردُه جيالك

الخدمة عندك .. زبالة

وال staff ... عليه تُقل دم و سَآلة

دا غير طبعا المشوار

و عشان اركِن الِف فى الشوارع و احتار

الأكل ... طعمه لو انت دُقتُه ما يِعجِبَكش

و الطبق ... لو اكَلتُه كُلُه ما يِشَبَعَكش

عارف انت لو كويس بس غالى

كنت جيتلك و دفعتلك من اموالى

انما انت غالى على الفاضى

و بالنسبالى مكان عادى

ماتزعلش من صراحتى

بس انت سيرتك بتقَلِل راحتى

يا ريت ما شوفكش قُرَيب

و كل سنة و انت طيب

كتب هذا الحوار كريم حلمى بعد ان ذهب مضطرا كالعادة الى Sequoia و استاء من مستوى الخدمة و الطعام المقدم...

تخيلات و تساؤلات - الجزء الأول -

١- هل كان يتخيل الكاتب الكبير عباس العقاد انه كل يوم حيتشتم زى مثلا " يخرب بيت عباس العقاد" لمجرد انه اسمه اتحط على شارع زحمة جدا فى مدينة نصر !! و الامر ينطبق على الزعيمين " مصطفى النحاس و مكرم عبيد " ؟!!!

٢- هل كان حد يتخيل ان الزعيم جمال عبد الناصر .. يخلف بنت تتجوز اشرف مروان .. و يخلفوا " جمال مروان " صاحب قنوات " ميلودى " اللى واضح انه عايز مصلحة البلد دى و بيفيدها بقنواته... يعنى حد يتخيل ان جمال مروان هو حفيد جمال عبد الناصر !!

٣- تساؤل : ليه فى الساحل الشمالى و الاسكندرية .. نلاقى سيدى جابر و سيدى كرير و سيدى عبد الرحمن ؟؟!! مين كل الاسياد دول انا عايز افهم ؟!

٤- تساؤل: ليه على الطريق الصحراوى .. بنلاقى يافطة " لا تنشغل بغير الطريق " و جمبها على طول يافطة كبيرة جدا كلها الوان و كلام و صور لازم حنشغل بيها !! يعنى هى الحكومة لازم تعسفنا !!

٥- تخيل ان مقولة " اخجلتم تواضعنا " اللى بتعبر عن الشكر و الامتنان و التواضع، هى اصلا فيها احساس بالذات و بعض من الغرور .. لان ببساطة بتقول " تواضعنا " و صيغة الجمع هنا معناها تعظيم نفسك !!

٦- تساؤل : لو كانت حرب اكتوبر ما حصلتش، هل كان حيبقى فى كوبرى اكتوبر ؟؟ و لا ما كنش حيبقى فيه الكوبرى ؟؟ ولا حيبقى ليه اسم تانى ؟؟

٧- طب تخيل لو فرنسا ما كنتش موجودة : هل كُنا حنقدر نعمل مترو الانفاق ؟؟ ولا مكنش حيبقى فيه مترو ؟؟

٨- تخيل ان مقولة " هى دى مصر يا عبلة " كانت بتتقال فى فيلم لما البطلة بتبص على مصر من الطيارة .. و المفروض انها شايفة بلد حلوة و جميلة !! المقولة دى طبعا دلوقتى بتعبر عن كل ما هو سيء و قبيح و بتعبر عن السخرية من اوضاعنا المهببة اللى وصلنالها !! مش الحاجات الجميلة تماما !!

٩- تخيل لو ماكنش فى " امريكا و اوروبا " .. هل كنا حنبقى جامدين و عايشين فى حرية و ديمقراطية و ازدهار و علم و اقتصاد قوى ؟؟؟ ولا كنا حنخلق الاعذار اللى تخلينا نبرر الفقر و الجهل و الاوضاع السيئة اللى حنكون فيها ؟؟!!

١٠ - تساؤل: هل لو اللى بنا مصر ما كانش فى الاصل حلوانى .. كانت ممكن مصر ما تبقاش مِلَزقَة و مليانة نمل زى دلوقتى ؟؟

( اللى بنا مصر .. كان فى الاصل حلوانى.. دى اغنية )

١١- تساؤل : البنات كانوا عايشين ازاى قبل ال carina ؟؟

١٢- تساؤل : ليه ٩٠٪ من محلات الكشرى بِتِقفِل فى رمضان ؟؟

هنا القاهرة ..

كتب هذا المقال كريم حلمى و هو يستمع الى فيروز - ايه فى أمل ...

قال الشاعر

تعالوا مع بعض نشوف الشاعر قال ايه ؟؟

" انا قولت اجرب حظى و اقعد انا على الفيس بوك ..

و اعرف ناس و " أشيت "* و احب و قلبى يدق ..

* أشيت : المقصود بيها اعمل Chatting

" حطيت صورة على ال wall ..

دى جمالها مش معقول ..

خلت شباب كتير يقولولى منورة ..

كان فيهم شاب cool

امور اوى و عسول ..

اديتلو تليفونى ، و ادانى missed call "

طبعا اللى مش فاهم ايه اللى انا كاتبه .. يتفرج على اللينك دا :

http://www.youtube.com/watch?v=cgPXi9coSKI

ايه القرف دا !!!!!!

مفيش تعبير يوصف السخافة و الرخامة بتاعة الاغنية دى .. دا غير طبعا القيمة و الرسالة الجميلة اللى توصَلِنا من الاغنية..

الأغنية بتقول للأطفال انهم المفروض يعملوا fake profiles على ال facebook و يتعرفه على بعض و يدو لبعض نمر تليفوناتهم و الحياة تبقى لطيفة و جميلة !!

مبدئيا .. الشركة المنتجة اسمها " الاخلاص للانتاج الفنى " .. انا عايز افهم فين الاخلاص فى الاغنية دى ؟؟ يعنى مفيش اخلاص فى الرسالة المقدمة .. مفيش اخلاص فى كتابة الكلمات ... مفيش اخلاص فى التلحين و التوزيع .. مفيش اخلاص فى اختيار البنت حتى ...

و بعدين نسأل سؤال تانى ... هو اصلا شركة الاخلاص دى .. حست انها حتكسب فلوس من ورا الاغنية مثلا !! .. يعنى شافو ان "علا" دى موهبة مثلا لازم يكتشفوها !! ..

و مفيش داعى اننا نتكلم عن الاخراج الرخيص و الردىء ...

باختصار ... دا شىء سىء للغاية .. و مش حتكلم اكتر عشان اتعصبت !!

هنا القاهرة ..

كتب هذا المقال كريم حلمى بعد ما اتعصب من اللى شافو ...

ارحمنا يا رب - الجزء الثانى -

الجزء الثانى:

- نحن نعيش فى بلد اللى بناها كان حلوانى ... و دا تفسير ليه البلد عندنا بقت مِلَزقَة و مليانة نمل ...

(الاغنية هى اللى بتقول .. اللى بنا مصر .. كان فى الأصل حلوانى)..

- نحن نعيش فى بلد تتسابق فيه القطارات مع السيارات على اعلى نسبة حوادث و ضحايا...

- نحن نعيش فى بلد فيه شىء اسمه " حمزاوى" ... (مساهمة من نوران عامر) ...

*حمزاوى حيبقى ليه post لوحده ..

- نحن نعيش فى بلد يُقتَرَن فيه اسم جبل "المقطم" بقلة الأدب ...

- نحن نعيش فى بلد بيشتغل فيه ٣٠٪ من الرجالة فى الشغل العادى .. و ٤٠٪ سُيَاس عربيات ... و ٣٠٪ شحاتين ...

- نحن نعيش فى بلد لا تُحتَرم فيه المواعيد ...

- نحن نعيش فى بلد ما ينفعش توصل اى حتة من غير زحمة ... و لما توصل مش هتعرف تركن ... و لو ركنت، هتركن فى الممنوع و هتدفع فلوس عشان " لما الباشا يعدى و كل سنة و انت طيب " ...

- نحن نعيش فى بلد يعيش فيه الاحياء جنب الاموات فى التُرَب و القبور ...

- نحن نعيش فى بلد لو ركبت فيه اى وسيلة مواصلات .. لازم هتطلع من غير قطعة من هدومك ... بنطلون .. قميص .. انت و حظك ...

- نحن نعيش فى بلد تزداد فيه الوطنية و الانتماء وقت كأس الامم الافريقية و بس ...

- نحن نعيش فى بلد منتخبها خِسِر من النيجر :)

- نحن نعيش فى بلد بيتسرق فيه لوحة " زهرة الخشخاش " - بفضيحة - و وزير الثقافة موجود عادى مفيش مشاكل ... (مساهمة من نوران عامر) ...

- نحن نعيش فى بلد فيه جامعة " القاهرة " فى " الجيزة " ... و فيها النادى الاهلى فى "الزمالك " ... (مش ملاحظاتى بس قريتها فى حتة ) ...

- نحن نعيش فى بلد وصل سعر كيلو الطماطم فيها الى ١٢ جنيه قبل ما السعر ينزل تانى ... فعلا مجنونة يا قوطة ...

- نحن نعيش فى بلد فيها ناس متجوزة و مِخَلِفَة بس عمرهم ما سمعوا كلمة "الرئيس" من غير ما يكون وراها كلمة "مبارك" ... "ربنا يخليك لينا يا ريس" ...

- نحن نعيش فى بلد تذهب فيه فيفى عبده الى الكباريه ... ثم الى المسجد لتصلى الفجر ... ثم الى منزلها ... ( فيفى هى اللى قالت كدة ) ...

- نحن نعيش فى بلد كان فيه احمد برادة بطل عالمى فى السكواش ... ثم يتآمر عليه بعض الناس و يضربوه ... فيتحول الى مغنى صوته وحش و ممثل دمه تقيل ...

- نحن نعيش فى بلد ٩٠٪ من محلات الكشرى فيه بتِقفِل فى شهر رمضان ... مش فاهم ايه العلاقة ! و افرض انا عايز اكل كشرى فى رمضان !!

هنا القاهرة

كتب هذا المقال كريم حلمى و هو لا يستمع الى اى شيء

ارحمنا يا رب - الجزء الاول -

عزيزى القارىء ... ال post دا مليان كآبة و نكد... القراءة على مسئوليتك..

- نحن نعيش فى بلد عاصمته تسمى " القاهرة " ، و لكنها فى الحقيقة " مقهورة " ...

- نحن نعيش فى بلد لا يُحتَرم فيه القانون ...

- نحن نعيش فى بلد لا عدل فيه و لا مساواة بين افراد الشعب ...

- نحن نعيش فى بلد لا يحصل الضعيف فيه على حقه ...

- نحن نعيش فى بلد يمكنك فيه المشى عكس اتجاه السير و تعريض حياة الناس للخطر فى اى و قت و اى طريق ...

- نحن نعيش فى بلد تغطى عاصمته سحابة هائلة من الدخان ...

- نحن نعيش فى بلد الرشاوى فيها شىء عادى و تسمى " اكرامية " ،، او " اشرب الشاى بتاعى " ...

- نحن نعيش فى بلد حكمه ٤ رؤساء فقط على مدار حوالى ٥٧ عاما ...

- نحن نعيش فى بلد لا يوجد به شارع بدون بلاعة مفتوحة او مطب مدمر .. و تُطَبَق مقولة " نطلع من حفرة ، نقع فى دحديرة "...

- نحن نعيش فى بلد تنشر فيه الصحيفة القومية صورة " متفبركة " لكى تظهر رئيس الدولة فى المقدمة .. قالك صورة " تعبيرية" ...

- نحن نعيش فى بلد يسكن فيه الناس القصور مثلما يسكن فيها ناس تانيين القبور ...

- نحن نعيش فى بلد ترتفع الاسعار فيه اضعاف ارتفاع المرتبات ...

- نحن نعيش فى بلد تحول شهر رمضان فيه الى شهر التلفزيون و السهرات و الخيم الرمضانية ...

- نحن نعيش فى بلد تنشر فيه معلومات كاذبة عن عدد مشتركى شركة كبيرة فى عالم الاتصالات " و بقينا ١٥ مليون . " مع ان فى الحقيقة هم حوالى ٨ مليون فقط ...

- نحن نعيش فى بلد يحلم ٧٠٪ من سكانه بالحصول على جنسية أخرى ...

- نحن نعيش فى بلد به انحدار اخلاقى رهيب ...

- نحن نعيش فى بلد تلبس فيه الكثير من المحجبات الملابس الضيقة و القصيرة .. و تلبس فيه الكثير من غير المتحجبات الملابس الفضفاضة الطويلة ...

- نحن نعيش فى بلد يذهب ٧٠٪ من شبابه لصلاة العيد على اساس انها " خروجة " .. و ليس على اساس انها من الشعائر الدينية ...

- نحن نعيش فى بلد لا يمكنك ان تستمع فيه الى خطبة محترمة قبل صلاة الجمعة ...

- نحن نعيش فى بلد يمنع فيه ظهور علاء صادق على شاشات التلفزيون لمجرد انتقاده لوزارة الداخلية ...

- نحن نعيش فى بلد فيه قناة اسمها " موجة كوميدى " المفترض انها تضحك الناس ...

- نحن نعيش فى بلد تظهر فيه اغنية تدعو الاطفال الى الدخول على ال facebook و "التظبيط" مع بعض ... اغنية " كذبة ال facebook - غناء : الطفلة علا " ...

- نحن نعيش فى بلد يعتبر فيه الشارع سلة قمامة مفتوحة ... ارمى فيها براحتك !!

عزيزى القارىء .. لو قريت ال post دا و لسه صحتك كويسة ... انتظر الجزء الثانى .. و احتمال يبقى فى post عن بعض الايجابيات فى هذا البلد الذى نعيش فيه !

ارحمنا يا رب .. هنا القاهرة ...

كتب هذا المقال كريم حلمى و هو يستمع الى " Haig Yazdjian - Garin " ...