الأربعاء، 6 أكتوبر، 2010

ارحمنا يا رب - الجزء الثانى -

الجزء الثانى:

- نحن نعيش فى بلد اللى بناها كان حلوانى ... و دا تفسير ليه البلد عندنا بقت مِلَزقَة و مليانة نمل ...

(الاغنية هى اللى بتقول .. اللى بنا مصر .. كان فى الأصل حلوانى)..


- نحن نعيش فى بلد تتسابق فيه القطارات مع السيارات على اعلى نسبة حوادث و ضحايا...

- نحن نعيش فى بلد فيه شىء اسمه " حمزاوى" ... (مساهمة من نوران عامر) ...

*حمزاوى حيبقى ليه post لوحده ..


- نحن نعيش فى بلد يُقتَرَن فيه اسم جبل "المقطم" بقلة الأدب ...


- نحن نعيش فى بلد بيشتغل فيه ٣٠٪ من الرجالة فى الشغل العادى .. و ٤٠٪ سُيَاس عربيات ... و ٣٠٪ شحاتين ...


- نحن نعيش فى بلد لا تُحتَرم فيه المواعيد ...


- نحن نعيش فى بلد ما ينفعش توصل اى حتة من غير زحمة ... و لما توصل مش هتعرف تركن ... و لو ركنت، هتركن فى الممنوع و هتدفع فلوس عشان " لما الباشا يعدى و كل سنة و انت طيب " ...


- نحن نعيش فى بلد يعيش فيه الاحياء جنب الاموات فى التُرَب و القبور ...


- نحن نعيش فى بلد لو ركبت فيه اى وسيلة مواصلات .. لازم هتطلع من غير قطعة من هدومك ... بنطلون .. قميص .. انت و حظك ...


- نحن نعيش فى بلد تزداد فيه الوطنية و الانتماء وقت كأس الامم الافريقية و بس ...


- نحن نعيش فى بلد منتخبها خِسِر من النيجر :)


- نحن نعيش فى بلد بيتسرق فيه لوحة " زهرة الخشخاش " - بفضيحة - و وزير الثقافة موجود عادى مفيش مشاكل ... (مساهمة من نوران عامر) ...


- نحن نعيش فى بلد فيه جامعة " القاهرة " فى " الجيزة " ... و فيها النادى الاهلى فى "الزمالك " ... (مش ملاحظاتى بس قريتها فى حتة ) ...


- نحن نعيش فى بلد وصل سعر كيلو الطماطم فيها الى ١٢ جنيه قبل ما السعر ينزل تانى ... فعلا مجنونة يا قوطة ...


- نحن نعيش فى بلد فيها ناس متجوزة و مِخَلِفَة بس عمرهم ما سمعوا كلمة "الرئيس" من غير ما يكون وراها كلمة "مبارك" ... "ربنا يخليك لينا يا ريس" ...


- نحن نعيش فى بلد تذهب فيه فيفى عبده الى الكباريه ... ثم الى المسجد لتصلى الفجر ... ثم الى منزلها ... ( فيفى هى اللى قالت كدة ) ...


- نحن نعيش فى بلد كان فيه احمد برادة بطل عالمى فى السكواش ... ثم يتآمر عليه بعض الناس و يضربوه ... فيتحول الى مغنى صوته وحش و ممثل دمه تقيل ...


- نحن نعيش فى بلد ٩٠٪ من محلات الكشرى فيه بتِقفِل فى شهر رمضان ... مش فاهم ايه العلاقة ! و افرض انا عايز اكل كشرى فى رمضان !!


هنا القاهرة


كتب هذا المقال كريم حلمى و هو لا يستمع الى اى شيء


هناك تعليق واحد:

  1. ya karim, a7med barada el nas mt2amroosh 3leeh men fragh hwa et3amal feeh kda 3shan el beeh kan msa7eb yasmeen 3abd el 3azeez w hya mtgwza wel 3amal kda feeh kan gozha, btw ana msh ded barada f ay 7aga w knt b7ebo gedan w hwa la3eeb :D

    el 7a2ee2a b2a, en e7na 3ysheen f balad mfeehash ryady wa7ed motakamel

    Mostafa Abu El-Dahab

    ردحذف