الذوق العام ... و انحداره

مش عارف ليه اغلبية الناس دلوقتى معندهمش اى تذوق لأى شيء حلو .. يعنى مفيش تذوق للجمال .. ولا النظافة .. ولا مقطوعة موسيقية .. ولا صوت عذب .. الخ الخ الخ ... بل بالعكس .. بقى فيه تقدير لكل ما هو عشوائى و غوغائى و قبيح ..

ناخد مثال بسيط .. الذوق فى اللبس و المظهر و تقدير حسن المظهر .. يكفى انك تنزل الشارع فى اول ايام العيد .. و قابل بقه التلوث البصرى .. كمية الوان غير متناسقة .. و البنات كلهم ضاربين حاجات بتلمع و ترتر و بروبرؤ " Brobro2 " :)) و طبعا كمية مكياج مستفزة .. و الولاد ملزقين الشعر و ضاربين السلاسل و حاجات عجيبة .. يعنى اى حد من دول لو بَص في مراية قبل ما ينزل أكيد حيحس إن فيه حاجة غلط او انه / انها مزودينها شوية ..

و محدش يقولى دى الناس البسيطة او اللِّى ظروفهم صعبة .. الذوق و تقدير الجمال المفروض مايكونش ليه علاقة .. يعنى اللبس مثلا مش لازم يبقى غالى عشان يبقى بالضرورة شكله كويس... و البنت مش لازم تكون اغنى و احدة فى الدنيا عشان تفهم ان كمية الالوان و الترتر و المكياج دى شكلها وحش جدا ..

طيب بلاش النقطة دى .. نيجى لموضوع تانى ...

زمان .. كان لو فيه مسابقة او اعلان .. تلاقى اغنية ل Spice Girls .. او موسيقى Lambada .. او حاجة ل Bob Marley .. انما دلوقتى .. تلاقى لازم المسابقة على اغنية العنب العنب .. او " حجرين الشيشة " او " انا شارب سيجارة بنى " ..

و طبعا ان كل الافلام دلوقتى لازم يبقى فيها اغنية بهذا الشكل " دا غير ان ٩٩٪ من الافلام اصلا بتتكلم عن العشوائية اللِّى وصلنالها " ..

دى وصلت لان نجوم اف ام عملت برنامج اسمه فى الموقف - او فى الميكروباص - حاجة كدة مش فاكر و الاعلان بتاع البرنامج كان اغنية جوجوجو و يالا يالا يالا و الحاجات العظيمة دى ..

طول عمرنا الفن الشعبى موجود .. بس اللِّى موجود دلوقتى دة فن عشوائى مش شعبى .. و المشكلة إنه بقى هو اللِّى علي السطح و باين .. و ييجى بعده اى شيء نضيف... يعنى لو موجود و مستخبى او محدود كنا قلنا ماشى .. انما دا بقى الطبيعى و العادى .. و بقى جزء من حياتنا - اللِّى بقت مليانة عشوائية - ...

لا تعليق .. هنا القاهرة ..

ملاحظات هامة:

١- انا مش بتكلم عن مستوى اجتماعى معين .. بتكلم على كل المستويات و الطبقات ...

٢- لما جيت اكتب ال post دى كان فى كذا فكرة عايز اتكلم عنها لكن للاسف و انا بكتب في حاجات تاهت منِّى خصوصا اننى تعبان و عايز انام..

٣- بمناسبة الميكروباص .. وسيلة المواصلات دى حتكلم عنها كتير قريبا ان شاء الله ...

٤- فى نقط ماتكلمتش عنها زى الزبالة اللِّى فى كل حتة مثلا ..

٥- طبعا فقرة البنات اللِّى عاملين نفسهم محجبات و اللِّى بيلبسوه و بيعملوه .. دول حيبقى ليهم post لوحدهم..

كتب هذا المقال كريم حلمى و هو يستمع الى "على موج البحر - لينا شماميان " ..

هنا القاهرة ... "افكار .. Ideas" سابقا ..

فى اول post ليه .. قولت إن انا اخترت اسم " افكار .. Ideas " لل Blog عشان انا دايما هاكتب الافكار اللِّى تيجى فى دماغى .. و قولت برضه اننى لو لقيت اسم حسيت انه احسن حغيره .. خصوصا اننى بزهق بسرعة اصلا .. المهم و انا بكتب اليومين اللِّى فاتو لقيت إن انا فى الغالب بكتب عن حاجات عن مصر .. او عن القاهرة بالتحديد .. فى الغالب يعنى .. و كنت بحب دايما اقفل كلامى ب " هنا القاهرة " .. عشان كده اخترته يبقى اسم ال Blog الجديد ... عايز رأيكوا :) .. your opinion plz :D

كتب هذا المقال كريم حلمى و هو يستمع الى " بلا ولا شى " لزياد الرحبانى ..

البلد " ما بقتش " بتاعة شهادات خلاص

من زمان بنسمع كلمة " بلد بتاعت شهادات " لعادل امام و اللِّي كانت بتجسد فكرة ان اللِّي معاه شهادة هو اللِّى بيشتغل و يحظى باحترام الناس..

اليومين دول الموضوع اتغير تماما ..

الموقف الاول:

المكان: أحد الفنادق بوسط القاهرة.

أمى تلاحظ و جود شباب فى بداية العقد الثالث من اعمارهم " ٢٥ " سنة مثلا .. يستعدون لرفع حقائب السائحين و النزلاء ..

امى: " معلش ممكن سؤال .. هو انتو بتشتغلو ايه هنا .. ؟ "

الشاب: " بنشتغل كده .. بنشيل الشنط .. bellman يعنى .. "

امى: " طب انتا دارس حاجة او فى جامعة ؟؟ "

الشاب :" اه .. انا خريج هندسة ميكانيكا !! "

الشاب التانى: " و انا خريج تجارة !! "

امى: " طيب و ازاى جيته تشتغلو فى شيل الشنط .. " --- مع احترامى انا و امى لاى شغلانة شريفة ... ---

الشاب:" انت مش عايشة فى البلد ولا ايه يا مدام .. هو حد لاقى الشغل .. "

--------------------------------------------------------------------

الموقف الثانى:

المكان: احد محطات البنزين ..

أختى دخلت تحط بنزين و طلبت من الراجل تلميع الازاز -- "زجاج السيارة "

الراجل: " والله يا آنسة انا زعلان اننِّى اتعلمت !! .. "

اختى: " اشمعنة .. ليه زعلان ؟؟ "

الراجل:" انا دارس و اتعلمت و بعرف photoshop .. و " كذا " و " كذا " و " كذا " ... و فى الآخر .. واقف فى بنزينه و بلمع الازاز .. يبقى ازعل ولا لأ .. !! "

و لا تعليق .. هنا القاهرة

كتب هذا المقال كريم حلمى و هو يستمع الى : "So Danso Samba " لزياد الرحبانى و سلمى ..

الوقت ... لا يكيل بالبتنجان

انهاردة صحيت ... لقيت الكهرباء مقطوعة ... قلت أستنى شوية ... ربع ساعة .. نص ساعة .. مفيش ...

كريم يطلب ١٤٠ - الدليل - و ياخد رقم شكاوى الكهرباء ... "١٢١"

كريم يطلب ١٢١ : " السلام عليكم .. لو سمحتى الكهرباء قاطعة عندنا من ساعة فى المعادى و مش عا... " ما لحقتش اكمل الجملة ..

-- on hold مع موسيقى Titanic --

واحدة ست تانية : الو..

كريم: الو .. بعد اذنك هو هنا شكاوى المعادى ...

الست : لحظة معايا ..

-- On Hold مع موسيقى حاجة تانية غير Titanic --

و فجأة .. الخط اتقفل فى وشى ....

كريم يطلب ١٢١لتانى مرَّة :" الو بعد اذنك كنت عايز شكاوى المعادى .. "

الست : " لحظة معايا .. "

-- On Hold --

راجل: " سلام عليكم "

كريم: " و عليكم السلام "

الراجل: " اؤمر يا باشا .. "

كريم " الكهرباء مقطوعة من ... الخ الخ "

الراجل:" هما شغالين و حالا حترجع الكهرباء "

كريم :" شكرا "

بعد ربع ساعة كدة .. خالى جالنا البيت ..

كريم:" الكهرباء بقالها حوالى ساعتين مقطوعة .. "

خالى :" اه ما انا روحتلهم عند الكشك الرئيسى و لقيتهم فاصلين الكهرباء و مش شغالين.. "

و لما خالى سألهم بالنسبة لان الكهرباء مقطوعة ..

الراجل اللِّى المفروض بيصلح :" ما تقلقش يا باشا احنا بس حنفطر و نشرب كوباية الشاى و نشتغل على طول !!!! "

النتيجة ان فيه منطقة من المعادى عاشت اكتر من ساعتين من غير كهرباء عشان البهوات ما كالوش فى بيوتهم قبل ما ينزلوا الشغل و ناويين يفطروا فول و طعمية و يحبسوا بكوباية شاى ..

لا تعليق ... هنا القاهرة ...

البرادعى ... و الفراغ اللِّى احنا فيه

من فترة كدة .. بدأت الناس تتكلم و تسأل مين ممكن يبقى رئيس مصر - سلامتك يا ريس و ترجعلنا بالسلامة :) - و طلعت الناس تقول اسماء " تفطس" من الضحك.

واحد قالك " زويل " - مع كامل احترامى للعالم الجليل - بس زويل ازاى يعنى .. ما مش اى حد و اخد نوبل نجيبو رئيس .. يعنى مثلا لو نجيب محفوظ كان عايش كنا قولنا يبقى رئيس.. بس عشان نوبل !!

و صلت الشجاعة لواحد انه يقول " عمرو خالد " - مع فائق اعجابى بالداعية برضه -

للدرجة دى بقى فى فراغ سياسى و غياب تام لأى شخصية عامة تلتف حولها الناس و نحس ان دا ممكن يقود البلد..

و الفراغ دا بقى بلغ ذروته يوم ما السيد البرادعى قال انه راجع مصر .. الناس نزلت باللافتات مكتوب عليها برادعى رئيس مصر ٢٠١١ .. و معاك يا برادعى ... و جروب على Facebook .. و الناس قعدة تبعت على Twitter .. قصة كبيرة مش فاهمها.. ٩٠٪ من الناس دى ما يعرفش البرادعى اصلا .. كل اللِّى سمعه انه كان ماسك منصب كبير فى و كالة دولية -- فى رأيى كان ليها دور " معوَّق و متخلف" قبل الحرب على العراق على سبيل المثال -- و بس .. انما عشان الناس مش لاقيين حد قدامهم خالص .. فا قالك يلا برادعى ..

انا معنديش مشكلة مع البرادعى بس لما نسمعه و نعرفه و نشوف بيفكر فى ايه ...

مش اطلع اطنطط و اهلل و اقول معاك يا برادعى لمجرد انه كان واخد نوبل او مدير للوكالة الدولية للطاقة الذرية ..

و فى النهاية .. احب اكرر نقطة قالها عصام ماجد - أحد اصدقائى - ان البرادعى مش عالم ذرَّة ولا بتاع معامل .. الراجل دارس قانون دولى ...

و يجعلو عامر "اخدت الكلمة دى من كاريكاتير مشهور فى اخبار اليوم .. عجبتنى" :))

التقاليع ... El Ta2alee3

Msh fahem eh el mawdoo3.. kol chwia netla3 fi ta2alee3 ghariba keda.. we agdad wa7da ba2a bta3et sowar el banat..

men fatra kda, ba2a lazem el bentein yetsawaro ma3 ba3d w homa bassin le ba3d w kol wa7da 7ata 2eed 3ala ketf el tanya.. wel 2eed el tanya fi wesstaha we lazem ba2a regl men el etnen teb2a wakhda curve kda.. mateb2ash wa2fa tabi3y ya3ni

tayeb msh mshkela di... 3adi ...

el ta2li3a el ba3daha - EL SAKHIFA GEDAN - mawdoo3 el booz el fel soora da - a7eb ashokor sprite 3ashan fel e3lan beyetaria2o 3al mawdoo3 - eh ya3ni msh fahem.. howa lazem w homa beyetsawaro ye3mlo el 7araka di ya3ni.. kda el welad hayo3gabo aktar ya3ni.. hano2a3 men tolna masalan awel manshoof el mawdoo3 da.. fag2a kol sowar el banat keda.. a7eb a2olohom en el de7ek 3alehom w 2alohom keda a7san msh fahem.. la2en el mawdoo3 bel 3aks ba2a... kda ba2et 7aga sakhifa w damaha te2il gedan.. ya ret balash.... eh el mshkela fel soora el 3adeya bta3et zaman el heya beno2af kolena bassin lel camera w bened7ak .. !!

Second Post

kaza 7ad 2ali eno 2ara my first post.. w 2ali tamam we kamel w bta3..

bas gali comment bardo en ana ma2oltesh 7aga.. aw en ana mashara7tesh 3ayez atkalem fi eh aslan ba3d kda ...

heya di el fkra.. en ana hakteb ay 7aga tigi di demaghi.. ya3ni momken anzel el share3 ashoof 7aga agi akteb 3anaha.. momken dlwa2ty awel makhalas ketabet my second post tigi 7aga di demaghi ... aktebha..

aslan fi kaza fkra fi demaghi abda2 biha.. bas mafish wala wa7da 3ayez abda2 aktebha..

3ashan kda mafish maslan plan eni hatklm 3an topic A , w B , w C .. la2.. el hayigi fel demagh.. haktebo :D

كتب هذا المقال: كريم حلمى و هو يستمع الى موسيقى " لما التعلب فات " لياسر عبد الرحمن.

ابدا منين

بقالى فترة عامل المدونة blog دى بس مش عارف ابدا منين. اكتب عن نفسى ولا اكتب عن الحاجات اللى شايفها فى البلد سواء عاجبانى او لا ، ولا اكتب عن السياسة اللى بحب اتكلم فيها جدا ، ولا اتكلم عن صحابى .. الخ الخ..

طيب اكتب بالعربى ، ولا بال English و لا عربى بس حروف English - اللى بيسموه Franco Arab - ولا ايه.

طيب لو كتبت عربى ، اكتب بالفصحى ولا العامية ..

طيب أسّمى ال blog ايه ... كل دى كانت افكار و حاجات فى دماغى مخليانى مش عارف ابدأ ..

و بما ان كان فى افكار كتير فى دماغى .. فا قررت انِّى اسميها " افكار " و مش بعيد بعد شويه تلاقونى غيرته لان انا اصلا بزهق بسرعة و لو جه على بالى اسم تانى احسن.. حاغيره.

المهم فى النهاية اننى قررت انى ابدا اكتب عن اول نقطة - او فكرة - انا واقف عندها ، اللى هى ان انا مش عارف اصلا ابدا منين.

و الموضوع دا جه فجاة .. من ربع ساعة و انا فى الحمام - معلش يعنى :) - و بقرا كتاب اسمه " كتابى " لابراهيم عيسى .. و بعد مكالمة تليفونية مع صديقة فكرتنى ان انا عاندى blog و مش كاتب فيها حاجة و لسه مش مرتب افكارى.

هل الحمام هو السبب .. يمكن :)

هل المكالمة التليفونية .. احتمال ..

هل الكتاب اللى كنت بقراه .. جايز ..

هل الزهق و عدم القدرة على انى ابدا مذاكرة .. ممكن جدا

المهم اني بدات اكتب...

فى النهاية اشكر ٢ من صحابى كانوا من ضمن الاسباب اللى خلونى اعمل ال blog دى من فترة اصلا.. او كان ليهم تاثير فى طريقة الكتابة ..

عمرو السلانكلى .. و Ashley Rhoderick.

و طبعا صحابى اللي شجعونى لما عرفو اني حعمل او عندى blog .. و علي راسهم .. نهى الطاهر .. و دينا ابو العزم .. انجى حسّان ... و اعتذر لو نسيت حد .. " جل من لا يسهو " ..

ملل اوى الفقرة الاخيرة بتاعت اشكر فلان و فلان .. بس معلش بقه :))