السبت، 24 أبريل، 2010

التقاليع (الجزء ٣ ) : Mwaah !! .. مواااه

ايه بقى ؟؟ مش كفاية بقة القصة بتاعت Mwahhh ! . .. love ya
ba7ebek awii..
ana aktar mwaaah ..

انا مش فاهم فعلا ايه قصة الحب اللى بقى مقطع بعضه بين البنات .. و كل يوم لازم يعبروا لبعض عن الحب دا !!!

يعنى كل يوم نفس البنتين بيبقوا كاتبين لبعض حاجات من عينة Mwahhh !! و love ya baby !! ..

و ال comments على الصور على ال Facebook .. لازم تبقى :

girl 1 : Ohhhh lovely ya mozzety... LOVE UU MWAAAH !!

girl 2 : thank you awiii sweety ! love ya MORE ! miss u awi b2a

مش كفاية بقى ولا ايه ... خلاص يعنى عبرتوا عن حبكوا مرة .. مش كل يوم بقة !!

هل اصلا الموضوع دا طبيعى و موجود من زمان بس كان على التليفون مثلا ..
و دلوقتى بقى على ال facebook زى حاجات كتير اتنقلت من مكانها الطبيعى الى الشبكة العنكبوتية Internet !!

لا تعليق
هنا القاهرة

الاثنين، 19 أبريل، 2010

مصر كِبرِت

دايما من زمان يقولك " مصر ام الدنيا " ...
طب ليه اليومين دول " الدنيا " كلها بتعامل مصر و حش و مش بتحترمها ؟؟

هل مصر مارابتش ولادها -" الدنيا "- كويس ؟؟
ولا هى حاولت تربيها بس " الدنيا " هى اللى بقت قليلة الادب و مش عارفة ازاى تعامل امها " مصر " ؟؟

طب ايه احسن طريقة مصر تعامل بيها "الدنيا" عشان ترجع تحترم امها ؟؟ هل تضربها مثلا ؟ ولا تزعقلها ؟ و لا تجبلها شيكولاتة و بونبونى ؟
للاسف مصر الام فقدت مكانتها و احترامها عند ولادها " الدنيا " لدرجة انهم خلاص مش بيحطولها اى اعتبار ولا بيعبروها اساسا !

طيب نيجى لنقطة تانية ...
بما ان مصر ام الدنيا ... و الدنيا دى كبيرة .. يبقى مصر كبيرة جدا .. ماهى ام الدنيا بقى ! ..
ممكن نقدر نقول عجوزة .. و طبعا دا تفسير كويس لكل امراض الشيخوخة اللى بدأت تظهر على مصر ...

عندك مثلا فقدان حاد فى الذاكرة و نسيانها لكل رموزها و عظمائها .. و ايضا نسيان لحقوق ابنائها اللى عايشين على ارضها او عايشين برا... و برده بقت بتنسى مين اعدائها و مين حلفائها .. يعنى يا حرام بقت بتفتكر ان اسرائيل صديقتها و حليفتها الاولى .. ربنا يشفيها..

برده عندك هشاشة في العظام مع قصور شديد فى الانظمة الحيوية و البنية التحتية من مواصلات و قطارات و طرق .. و الخ الخ ..

حاسة السمع و حاسة البصر بقت سيئة للاسف .. يعنى السمع و النظر عندها مش زى الاول .. فا مصر مابقتش بتسمع اللى بيستغيث و يستنجد بيها .. ولا بتشوف المعاناة اللى ابنائها و اهلها عايشين فيها...

طبعا المخ بقى عنده حالة من عدم القدرة على الحكم على الامور .. و لا العدل بين الناس ... ولا اعطاء الحق لصاحبه ... الخ الخ ..

ربنا يشفيكى يا مصر ...
و فى النهاية لازم نغير المقولة الى " مصر ام الدنيا .. عشان كدة كِبرِت و خَرَّفِت !! " ...

"Masr 2om El Donia .. 3ashan Keda Kebret We Kharafet !! " ..

هنا القاهرة ...

كتبت هذا المقال كريم حلمى و هو يستمع الى " هدوء نسبى - زياد الرحبانى "

الخميس، 8 أبريل، 2010

القُبة رجعت لترابها و عَبَلها

الكلام اللى تحت دا من تأليفى .. معرفش دا يقع تحت بند ايه ؟ .. يعنى سجع ولا ارتجال و لا ايه .. بس لا اعتقد انه وصل لمرحلة الشعر ...
المهم .. القصة ان انا كنت امبارح فى جامعة القاهرة .. و كنت قدام القبة المشهورة .. و افتكرت القصة بتاعت اوباما و الخطاب و لما راحو نظفوا الجامعة و القبة استعدادا للخطاب...

العنوان: القبة رجعت لترابها و عَبَلها ... ( عَبَلها هى نفس معنى ترابها )

من سنة كدة انتخبوه ..
و قالوا اوباما ياهوو..

الراجل جاى يغير..
و العراق حتتحرر ..

و ادولوا نوبل للسلام
و قالولوا يالا الى الامام

قال انا جاى مصر..

قولنا تشرف و تآنس
و حتزور الجوامع و الكنائس

نضَّفنا الشوارع
و القلعة و الجامع
و كل دا عشان خطابه الواقع

قال انا حاخطب فى الجامعة
تحت القبة و الناس كلها سامعة

على طول فرق النضافة اتحركت
و على القبة راحت و نضَّفت

زينة و انوار
ورود و أزهار

و دلوقتى اهو بعد ما فاتت شهور
مفيش حاجة اتغيرت فى الامور

حتى القُبة خادت بالها
و رجعت لترابها و عَبَلها


الأربعاء، 7 أبريل، 2010

كتاب مالوش اسم .. لاحمد العسيلى

من ٣ شهور كدة ، كنت بدات اقرا كتاب اسمه " كتاب مالوش اسم " لاحمد العسيلى .. و بعد كدة اتشغلت و مكملتوش للاسف .. المهم ان امبارح الكتاب دا وقع تحت ايدى ،، و المفاجأة كانت لما قرات المقدمة تانى !! .. اول post ليا " ابدا منين " ، هو نسخة و فيه تشابه كبير بينه و بين اول جزء فى مقدمة الكتاب ... يا ترا دى كانت صدفة ر هيبة و تشابه فى طريقة كتابة المقدمة .. ولا انا عقلى الباطن اتأثر جامد بمقدمة الكتاب .. لدرجة خلتنى اكتب مقدمة زيها لل blog ... مع ان الفترة الزمنية كبيرة جدا بين لما قرات الكتاب ، و لما كتبت اول post .... ! .. شيء عجيب !!!

الثلاثاء، 6 أبريل، 2010

التقاليع ( الجزء ٢ ) - كرومبو - El Ta2alee3 - part 2 - Krombo

لم يكن القائمون على عمل " مسابقة كرومبو " يتوقوعون اللى هيعملوا فينا و انهم يبقوا السبب فى كمية مسابقات سخيفة بشكل يرفع ضغط الدم ...

البداية كانت فى شهر رمضان من سنتين كدة .. بدأت مسابقة كرومبو على قناة ميلودى و نجحت نجاح ساحق ... و كان المفروض انها هتخلص بعد رمضان ... بما انها كانت ناجحة ، كملت بعد رمضان ... و كانت السبب فى تقليعة جديدة ... المسابقات اللى معموله بال Graphics ...

و تلاقى " سرحان و نفيسة " و التانية بتاعت الاغانى دى .. و كله كوم ، و بتاعت " الخاطبة " كوم ... EH EL RAZALA DI !!!!!!!!!!

يعنى و هم قاعدين بيعملوا المسابقة .. كانوا بيضحكوا على القرف دة ؟؟ شايفينوا كوميدى مثلا !!

احنا شعب مش بيسيب اى حاجة ناجحة الا لما يقلدها و يعمل مليون نسخة منها لحد ما نبوظها و نخليها سخيفة !!

و لا تعليق .. هنا القاهرة ...
كتب هذا المقال كريم حلمى و هو يشاهد مسلسل " يتربى فى عزو " ...

ملحوظة:
احب اشكر " مها " عشان قالتلى على فكرة اننى اخلى " تقاليع " دى حاجة ثابتة .. زى المقالات الثابتة اللى فى الجرائد كدة...

السبت، 3 أبريل، 2010

عايز اطلع برا القاهرة ..

دايما عندى فكرة انى اسافر اشتغل برا ... مش فكرة الفلوس .. انها حتبقى اكتر و كده .. بس فكرة اسلوب الحياة نفسه ... عايز حياة مفيهاش زحمة ... مفيهاش تلوث رهيب .. مفيهاش زبالة ارتفاعها اطول من جبال البحر الاحمر ..

و لقيت ان الكلام دا مش معناه اننى بالضرورة اسافر برة مصر .. انما على الاقل برة القاهرة ..

ساعات كتير لما اقول اننى بفكر اسافر عشان حال البلد مابقاش كويش .. ناس تقوللى :" طب ما تقعد و تحاول انت و جيلك من الشباب تصلحوا البلد.. " طيب تعالوا نبص على مميزات و عيوب القاهرة و نشوف كدة ..

المميزات:
١- اهلى و قرايبى و ناسى و صحابى.
٢- اللغة.
٣- الاعياد و المناسبات و الاحتفالات.
٤- الدين " مع ان طبعا اخلاق الناس بقت فى التلاجة"
٥- موضوع ان القاهرة لا تنام و ممكن تنزل بالليل او تتاخر برة البيت و انت مش قلقان و كده..
٦- التاريخ و الآثار و الحسين و الاهرامات و كوبرى قصر النيل و ساقية الصاوى و المسارح و حفلات الفرق الموسيقية و الاوبرا...

دى كانت بعض المميزات .. طيب نيجى للعيوب:
١- تلوث رهيب يسبب ازمات صحية طاحنة.
٢- ضوضاء شديدة توثر على حاسة السمع، و ترفع ضغط الدم و تخليك على طول متعصب.
٣- مطبات فى الشارع و حفر و بلاعات مفتوحة .. يعنى عربيتك حتبوظ او و انت ماشى حتقع فى البلاعة.
٤- جو حار جدا جدا جدا صيفاً .. و حار شوية شتاءاً.
٥- فوضى مرعبة فى الشوارع .. غباوة رهيبة فى القيادة .. غياب لاى قوانين مرورية ..
٦- حتضطر تدفع رشاوى عشان تمشى حالك ..
٧- طول ما انت ماشى حتلاقى ناش عايزة فلوس مقابل انهم بيقولولك " كل سنة و انت طيب" .. السايس .. الراجل اللى فى السينما بيوريك مكانك .. الست اللى قاعدة فى شباك التذاكر ... لدرجة اننى بدات اخاف ان صحابى اللى بيقولولى " كل سنة و انت طيب " فى عيد ميلادى ممكن يكونوا عايزين فلوس برضه.
٨- زحام شديد.. مفيش مكان ممكن تروحو فى اقل من ساعة..
٩- ارتفاع فى اسعار كل شىء.
١٠ - جهل و امية بشكل رهيب.
١١- انهيار الذوق العام.
١٢- انحطاط الاخلاق.
١٣- زبالة فى كل مكان .. " صحرا ان كان .. او بستان " .

نكمل كلامنا عن الناس اللى بتقوللى اقعد و صلح البلد انت و جيلك ..
حال البلد دى عشان يتصلح بعد الفساد و الجهل و المصائب اللى موجودة دى .. عايز كام سنة ؟؟ ٢٠ او ٣٠ سنة مثلا... طيب انا بعد ٣٠ سنة حيبقى عندى ٥٢ سنة - ان شاء الله و ان عشنا و كان لينا عمر - .. يعنى انا لما يبقى عندى ٥٠ سنة ابدا بقى احس ان البلد اتصلحت و حالها بقى احسن !!! .. هو فيه فى العمر كام ٥٠ سنة اساسا !!...
و بعدين هل المزايا اللى حاخدها من البقاء فى القاهرة تخلينى اضحى بصحتى و باستمتاعى بالحياة .. ؟؟! --الدخان اللى بنتنفسوا دا، مش حاسين بمشاكلوا دلوقتى .. و لاقدر الله، و ربنا يستر من اضراره..--
طيب و هل انا مطالب اننى اضحى براحتى عشان احاول اصلح البلد عشان الاجيال اللى جاية ترتاح ؟؟!!

انا عارف ان لو سافرت الحياة مش حاتبقى وردى و فى كل مكان فيه قرف برده ... بس على الاقل نسبة القرف دى حتبقى فى نطاق المحتمل ... انما فى قاهرة المعز .. القرف بقى فوق كل الحدود ...

هنا القاهرة ..
كتب هذا المقال كريم حلمى و هو لا يستمع الى اى حاجة ..


الخميس، 1 أبريل، 2010

الحاج "كارينا" .. و اللِّى عملوا فينا

المكان: بلكونة شقة فى مدينة نصر ... الحاج "كارينا" قاعد يفطر و ياخد الشاى ..

كارينا : " انا هاعمل ثورة فى اللبس ... و هاسميها ثورة الكارينا " ..

و طلع الحاج قعد فى المعمل بتاعه لحد ما اخترع خامة جديدة أطلق عليها " الكارينا " ...

ما هى " الكارينا " ؟؟

الكارينا هى شيء ظهر فى حياتنا منذ قرابة الاربعة أعوام - او يمكن انا مكنتش اعرفه قبل كده - ، استخدمته الكثير من البنات كشىء يلبس تحت الهدوم.
ثم تتطور الموضوع ليمتد الى المحجبات، اليومين دول بقى ، البنات اللابسين طرحه و عاملين نفسهم محجبات بيتعاملوا مع الكارينا على انه اللبس الواسع الفضفاض اللِّى مش مبين حاجة ...

بعيدا عن موضوع الكارينا ... ايه قصة الحجاب بتاع اليومين دول بقى ... يعنى انا نفسى افهم البنت اللِّى بتلبس جينز و top ماسكين و "محزقين" عليها جدا ... و بعدين تلبس طرحه على دماغها و تغطى شعرها و تقولك انا محجبة ... ايه الهبل و التخلف دة
HABAL WE TAKHALOF WE ESTEFZAZ !! ...

ما تقلعه احسن... يعنى هى خلاص لما غطت شعرها كدة بقت محجبة .. و بعدين الرجالة حيسيبوا كل حاجة تانية و يتفرجوا على شعرها .. و بعدين هو شعرك جامد قوى كده و لو شفناه حنطلع لساننا و نقع من طولنا مثلا... ؟؟!! قمة الفتنة فى شعرك دا ولا ايه ؟؟!!!

انا نفسى حد يقوللى فيه ايه فى دماغ البنت اللِّى بتعمل الحجاب العجيب دة ؟؟

اكيد فيه ازدواجية فى التفكير و الرأى فى دماغهم ... يعنى هى عايزة تتحجب - عشان ربنا او عشان اهلها .. او .. او .. - و فى نفس الوقت عايزه يبقى شكلها ملفت عشان حد من الولاد " يتطس فى نظره " و يعجب بيها...

و بعدين ما هى ممكن تبقى محجبة .. و لابسة محترم... و شكلها كويس جدا و كل حاجة ... مش لازم يعنى البهرجة و الحركات الكتير عشان يبقى شكلها كويس...

و بعدين تلاقى واحدة مغطية شعرها و سايبة " القصة .. el 2ossa " .. و التانية اللِّى عاملاه زى بتوع الخليج كدة !! و كمية الوان و ماكياج غير طبيعية !!
و اوعى بقه العبايات الماسكة و بتلمع .. و فيها ترتر... شىء مش ممكن..
يعنى حته العبايات اللِّى المفروض انها تكون واسعة .. مابقتش !!

و بعدين واحدة تقولك دا حجاب Spanish !! .. اhehehehe ... مش فاهم ايه علاقة اسبانيا بالموضوع .. ولا مثلا دا كان style البنات فى دولة الاندلس قبل سقوط الاسلام هناك !!

رجوعا للكارينا فهى دلوفتى مكتسحة ... و بقى فيه بنطلون كارينا "aka. leggings" و مش عارف ايه كارينا و كله بقى كارينا... و بالمناسبة برضه العاملين نفسهم محجبات بيلبسوا البنطلون ده و عادى كانه واسع مفيش مشكلة يعنى...

و الحاج " كارينا " نفسه .. باع شقة مدينة نصر و اشترى ارض و بيبنى فيلا بعد النجاح الساحق اللِّى عمله..

انا مش ضد الحجاب طبعا .. بس ضد التخلف و الجهل و خلط المفاهيم اللِّى بيحصل اليومين دول...

البنت اللِّى عايزه تلبس براحتها.. ماتلبسش الطرحة و تقول انا بقيت محجبة ... تقلعه احسن بدل ما هى مبوظة سمعة الحجاب.. و بعدين انا عن نفسى ما بقتش بربط بين الحجاب و الاحترام ... و احترم واحدة مش محجبة اكتر من واحدة " لابسة طرحة و عاملة محجبة " و هى مالهاش علاقة بيه و لابسة لبس مالوش علاقة بالحجاب.
الِّى عايزة تبقى محجبة فعلا يبقى لازم تقدم شوية تضحيات .. زى التضحيات اللِّى اى حد بيقدمها لما ييجى يطلع زكاة او يقوم يصلى او اى حاجة...

و لا تعليق ... هنا القاهرة ..

ملحوظة هامة:

ba3d ma 2areit el comment bta3 " Fantakosia " ta7t -- kanet bet2oli 3ala no2tet eni ba7terem wa7da msh mo7agaba aktar men wa7da labsa tar7a w labsa lebs maloosh 3elaka bel 7egab -- w geit arod 3aleh.. la2et enaha ma3aha 7a2 chwia fi eni mmkn akoon batsara3 fel 7okm 3ala wa7da kda ... bas ana kan asdi en el 7egab lel asaf maba2ash leeh 3elaka bel e7teram... msh fkret en akid wa7da msh mo7aga hateb2a a7san men el tanya ...

كتب هذا المقال كريم حلمى و هو يستمع الى " Sa7ra Band - Baskioula " ...